فى ناس ماتت عشان تعبر و ترفع يا بلد اسمك
و ناس عاشت عشان تهبر و تنهش حته من جسمك
فى ناس حاربت عشان عرضك روت من دمها ارضك
و ادت يا وطن فرضك بدووون لحظه ما تتردد
فى ناس ماتت عشان مبدأ سنين بسلاحها ف الخندق
و مين ممكن يكون اصدق؟ . من اللى عشانك استشهد!
ف ناس ماتت بلا زفه و سابت مصرنا واقفه . و لو يتحط ف الكفه بطل منها (بجيش كامل)
لا تعرف يعنى ايه تطبيع ولا معنى انك انت تبيع . تاريخ امه خلاص بيضيع بوهم اسمو سلام شامل!
فى ناس قضت على الجبهه سنين مكويه بلهبها تاريخنا عمرو ما جابها ولا سجل حكايتها!
لا سألت عن مكاسبها ولا العيله اللى هاتسيبها ولا كانت بتحسبها و ضحت راضيه بحياتها
فى ناس حاربت و مش عايزه ولا تكريم ولا جايزه و قابلت ربها فايزه بجناتو و رضوانه
و ناس عاشت عشان تحرق وطن و ف ثروتوا تسرق و جاهزه تهج لو يغرق فلا عاشوا ولا كااانوا
فى ناس لاجل البلد صنعت ملامح نصر بيه رفعت رقابنا فوق و ما طمعت ف مال يا مصر او شهره
فى ناس لاجل البلد قاست و فوق المستحيل داست و ناس من بعدها عافت فساد فى ارضك الطاهره
من الشهدا ف عبور الجيش الى الشهدا ف طابور العيش سنين فاتت و مقدرتيش تصونى نصرك الغالى
فى ناس سرقت ثمار النصر و باعت كل حاجه ف مصر و خلتنا نعيش ف عصر ماهيش بلدى و انا مالى
و انا مالى . و انا مالى . و انا مالى
