Stu paese di cuccagna
Ch'ella era a to giuventù
Oramai l'abbia in brama
Hè finitu ùn torna più
Spapersu in questu mondu
In cerca d'ogni virtù
Piglia è atteppa le cunfine
A verità hè quassù
Quassù si pesa l'altagna
È lu muvrone dinù
Si discioglie ogni pena
È l'amore ùn more più
L'acqua di la funtanella
Corre tramezu à li foi
Ne pasce la pecurella
Senza tèmene li boii
Quì si scopre l'orizonte
L'altu mare è l'al di là
Quì si marchja ad'alta fronte
È timore omu ùn ne hà
Quì si àprenu le porte
Per quellu chì sà pichjà
Nun si teme malamorte
Quì tuttu hè umanità
Quì spunta lu prim'albore
À l'oriente quallà
Quì sbuccia lu primu fiore
U fiore di a libertà
Cù la luna è cù lu sole
Sempre per l'eternità
Ci stà l'anticu maestru
Cù l'ochju di a verità
