اصحى يا نايم اصحى يا نايم وحّد الدايم
مسحّراتي من أهل بلدك جايلك يصحصح قلبك وبدنك
جوايا فكرة بتزوق فكرة و أمل ينادي على شمس بُكره
اصحى يا نايم وحّد الدايم
ماسك طبلتي في إيدي بدقدق خمس دقّات
دقة ملح فيها سميطنا يتغمّس
وفول سُحورنا يحلى بيها ويتدمّس
و دقّة بظبّط بيها رِتْم دنيتنا
ودقة نصَحْصح الكسلان في سكِّتنا
و دقة فوق دماغ الظلم يتربّى
ودقّة قلب من غلبان شايل في طبلته محبّة
اصحى يا نايم وحّد الرزاق
رمضان كريم
كلمات: سامح خيري
ألحان وتوزيع: حمزة نمرة
