رعاك الله يا ذكرى ليالي اللي تمر البال
تذكرني سعاده يوم اغمض وابحر بفكري
تغير حالي المنهك طيوف الحب لأفضل حال
تباعدني عن الدنيا ومافيها ولي عذري
انا العاشق عشقت الشمس والقمره غلا وآمال
انا المغرم ومازال الغرام يهب في صدري
انا الماضي وانا الحاضر وانا مستقبل الاجيال
انا لي في ايديني لعبة الاحلام من بدري
انا الافراح والارباح والفايض وراس المال
انا الافكار والاسرار وادفن في الفضا سري
بعيد هناك ما ينشاف وان شافوه ما ينطال
اعيشه بيني وبيني وكل الناس ما تدري
اصابر واتصبر واعرض حروفه حكم وامثال
ومهما راحت الدنيا بأهلها ما نفذ صبري
فمان الله وحفظ الله وتبقى دايمن في البال
فمان الله يا شخصن مع عمره خذا عمري
