نصّ القلب رسمتلّو ع الورقة و بعتّلو
شو تعليقك ع الموضوع بكعب الصفحة كتبتلّو
كفّا بإيدو رسم القلب و صوّر قلبو حدّ القلب
و قلّي اللي بدّو التاني يحبّ بيرسملو قلبو كلّو
تكرم عينك يا محبوب قلبي و روحي و عينيّي
أنا قلبي بإسمك مكتوب لكن مش حاسس فيّي
عن قصد رسمتلّك قلبي ناقص عنّك مش رحّ خبّي
نصّو ذاب بليل الغربة و النصّ التاني بمحلّو
لا تزعل منّي و تصير تحاسبني و تعلّمني
حبّي لقلبك حبّ كبير بيكفي حاجي تظلمني
مين قلّك ترسم قلبين و تحسب إنّو نحنا إتنين
خلّينا قلب بنصّين عن بعضن ما بيتخلّو
