summer 2015,
hie chunnt dr dritt, dr letscht, dä teil,
wo no fäut im mosaik
für üsi fründe & ver- wandte, freaks,
vögu & vagante & no einisch für di,
mi amor, mi querida, compañera de toda mi vida –
us de ouge, aber nid us em sinn
das si nid songs,
das isch en abschiedsbrief & nes röntgebiud.
das isch e fläscheposcht & die schouklet wyt usse i de wäue
vom ne ändlos tiefe, dunkublaue meer.
das isch die auti gschicht
vo däm aute chrueg,
wo so lang zum brunne geit, bis är bricht & das isch ds sauz vo de träne,
ds vertröchnete bluet,
d äsche vor verbrönnte geduld,
die dünni huut & ds dunkle härz.
& kes schlächts wort über di.
nix. nada. niente & rien du tout.
nid eis schlächts wort über di
aber nüt vo au däm schaffts bis zu dir.
du schteisch uf dr häue syte vo dr schtrass
& d sunne schynt dir i dys gsicht
& du blinzlisch
& geisch wyter.
